Жорий йилда халқимиз ва халқаро ҳамжамият эътиборига Давлатимиз раҳбарининг “Ўзбекистон мустақилликка эришиш остонасида” номли янги асари тақдим қилинди. Асарда Ўзбекистон Республикасининг Президенти Ислом Абдуғаниевич Каримов томонидан давлат мустақиллигига эришиш арафасида ва истиқлолнинг биринчи ойларида амалга оширилган кўпқиррали ижтимоий-сиёсий жонбозликлар акс эттирилган.

Мамлакатимизнинг ўша даврдаги мураккаб тарихий ривожланиш жараёнида Юртбошимизнинг муҳим мақолалари, маърузалари ва интервьюлари илк бор яхлит китобда мужассамлаштирилди.

Мазкур китоб Ўзбекистон Республикаси Президентининг аввал нашр этилган асарларини давом эттириб, мамлакатимизнинг ижтимоий-сиёсий ва социал-иқтисодий ривожланиш жараёнларини ҳаққоний тарзда тасвирлаб беради. Шу билан бирга, унда ҳуқуқий давлат барпо этиш ва фуқаролик жамиятини шакллантиришга қаратилган ислоҳотларимизнинг маъно ва мазмуни объектив тарзда очиб берилган.

Давлатимиз раҳбарининг ушбу асари билан танишаётиб, ўқувчи халқимизнинг узоқ кутилган орзуси – истиқлолга эришиш учун босиб ўтилган қийин ва машаққатли йўлни ҳужжатли материаллар асосида тасаввур қила олиш имкониятига эга бўлади.

Мазкур китоб билан танишиш орқали унда тасвирланган воқеа ва ҳодисаларнинг 20 йиллик мустақил ривожланишдаги ижтимоий-сиёсий, илмий-назарий ва тарихий аҳамиятини яққол англаб оламиз.

Ўтган мустақиллик йиллари Юртбошимиз томонидан ўша даврда қабул қилинган қарорларнинг қанчалик тўғрилиги ва узоқни кўзлаб қабул қилинганлигини исботлайди. Ушбу қарорлар мамлакатимизнинг дунё тан олган ўз йўли – “ўзбек модели” асосида изчил ривожланиши ва жаҳон ҳамжамиятига тенг ҳуқуқли субъект сифатида интеграциялашувига асос яратди.

Ўзбекистон Республикасининг Президенти Ислом Абдуғаниевич Каримов томонидан истиқлолнинг илк йилларидаёқ белгилаб берилган “Ўзбекистон – келажаги буюк давлат”, “Янги уйни қўрмасдан туриб, эскисини бузманг”, “Ислоҳот – ислоҳот учун эмас, аввало инсон учун” каби устувор чақириқлар  “ўзбек модели”нинг моҳиятини ифодаловчи ибораларга айланди.

Ушбу китобнинг материаллари мамлакатимизда 1989-1992 йилларда юз берган ижтимоий-сиёсий воқеаларни қамраб олади. Таъкидлаш жоизки, ўша замонлар анча оғир бўлган, чунки янги мустақил давлатнинг ташкил топиши ўта мураккаб ички ва ташқи ижтимоий-сиёсий шароитда амалга ошаётган эди.

Давлат мустақиллигига қон тўкмасдан босқичма-босқич эришишга, оғир ижтимоий-сиёсий вазиятни барқарорлаштиришга ва миллатлараро тотувликни таъминлашга қаратилган мураккаб қарорлар Мамлакатимиз раҳбари Ислом Абдуғаниевич Каримовнинг нафақат доно ва узоқни кўра оладиган сиёсатчи, шу билан бирга мард ва жасур инсон эканлигини ҳам кўрсатиб беради.

Собиқ Иттифоқ партия органлари раҳбарларининг муносабатларини олдиндан белгилаб қўювчи ва репрессив механизмга эга бўлган коммунистик мафкура ҳукмрон бўлган даврда бундай қарорларни қабул қилиш Давлатимиз раҳбаридан катта мардлик ва жасоратни талаб қилар эди.

Шундай қарорлар қаторида Ислом Абдуғаниевич Каримов ташаббуси билан 1990 йил 24 мартда Ўзбекистон ССР Олий Кенгашининг ўн иккинчи чақириқ биринчи сессиясида собиқ Иттифоқ республикалари орасида илк бор Ўзбекистонда Президентлик институти жорий этилганлигини таъкидлаш лозим.

Ушбу қарорни партиянинг марказдаги раҳбарлари нохуш қабул қилганлигига қарамасдан, Давлатимиз раҳбари томонидан мазкур институт мамлакатимизнинг ҳуқуқ тизимига муваффақиятли тарзда жорий этилди.

Бу воқеа ва ҳодисалар нафақат Ўзбекистоннинг мустақиллик ва суверенитетга эришиш йўлидаги тарихий қадами, балки Давлатимиз раҳбарининг сиёсий ва руҳий тетиклигининг яққол намунасидир.

Мазкур китобда келтирилган ҳужжатлар мустақилликка эришиш, бозор иқтисодиётини шакллантириш, суд-ҳуқуқ тизимини такомиллаштириш йўлида эришилган улкан ютуқларимиз, халқимиз фаровонлиги, фуқароларнинг тинч ва осуда ҳаёти катта куч ва матонат талаб қилинганлигини кўрсатиб беради.

Ушбу китобда тасвирланган воқеа ва ҳодисалар мамлакатимизда демократик ислоҳотларни янада чуқурлаштириш ҳамда фуқаролик жамиятини шакллантиришнинг ҳозирги босқичидаги ислоҳотларнинг муваффақиятини белгиловчи дастлабки тарихий асослар бўлганлигини таъкидлаш зарур.      

Хулоса сифатида айтиш жоизки, Ислом Абдуғаниевич Каримовнинг “Ўзбекистон мустақилликка эришиш остонасида” китоби мамлакатимизнинг демократик ривожланишини янада чуқурлаштириш борасида катта аҳамиятга эга бўлган муҳим сиёсий-ҳуқуқий асардир.

Зумрад Акромхўжаева,

Ўзбекистон “Адолат” СДП

Тошкент шаҳар Кенгаши раисининг ўринбосари,

юридик фанлар номзоди

Mulohazalar

Mulohaza qoldirish

Ism *:

Kod *: