19 январь куни Тошкент ахборот технологиялари университетида Ўзбекистон Республикаси Олий Мажлиси Қонунчилик палатасидаги Ўзбекистон “Адолат” СДП фракцияси, Ўзбекистон Олий ва ўрта махсус таълим вазирлиги ҳамда мазкур университет билан ҳамкорликида “Электрон таълим ва масофали ўқитишнинг ҳуқуқий асосларини такомиллаштириш масалалари” мавзуидаги электрон конференция ташкил этилди.

Тадбирнинг асосий мақсади Ўзбекистон “Адолат” социал-демократик партияси дастурий мақсадларини таъминлаш, таълим тизимига инновацион технологияларни жорий этиш, турли аҳоли қатламларининг таълим олишга бўлган имкониятларини кенгайтириш, бу борадаги масофадан ўқитишнинг жамият ривожидаги аҳамиятини муҳокама этиб, унинг ҳуқуқий асосларини такомиллаштиришдир. Бунда таълим соҳасидаги масъул вазирликлар ва бевосита олий ўқув юртлари иштирокида масофавий алоқа воситаларидан фойдаланган ҳолда соҳага оид ҳуқуқий базани кенг ўрганиш ҳамда жамоатчилик иштирокида муҳокама қилишдан иборатдир. 

Масофавий таълим тизими ҳар бир фуқарони республикамизнинг қайси олис тумани ёки хорижий давлатда бўлишидан қатъи назар ушбу ҳуқуқини амалга ошириш имкониятини беради. Шу билан биргаликда, бу тизим  таълим олиш соҳасидаги жамиятнинг эҳтиёжларини ҳамда ҳар кимнинг билим олишга бўлган конституциявий ҳуқуқини амалга оширишни таъминлайди.

Конференцияда Олий Мажлис Қонунчилик палатаси Спикери ўринбосари И.Саифназаров таълим тизимидаги инновациялар масофали ўқитиш имкониятини бергани, бу педагог учун ҳам, ўқувчи учун ҳам қулайлик яратишини таъкидлаб, 2011 йилда таълим тизимига давлат бюджетидан 7.2 триллион маблағ ажратилганига аҳамият қаратди. Фракция аъзоси З.Ботирова масофавий таълим ишга индивидуал ёндошиш, ўқитувчи ва ўқувчига ўз устида ишлаш имкониятини бериши ҳақида фикр юритиб, таълимнинг бундай тизими қулай бўлиш билан бир қаторда, адолатли ва холис эканлигига урғу қаратди. Парламентда бизга нисбатан янги бўлган ушбу соҳага оид қонун лойиҳаси ишлаб чиқиш таклифини берди.

Ушбу ноанъанавий тарзда ўтказилган тадбир мамлакатимизнинг 70дан ортиқ олий таълим муассасаларида, яъни ўз вилоятларидан масофавий уланиш орқали реал вақтда ўтказилди. Бу ўз навбатида масофавий таълимни йўлга қўйиш борасида амалий қадамлардан бири бўлди. Конференцияда нафақат олий таълим тизими, балки халқ таълими ва ўрта-махсус таълим тизими вакиллари ҳам бевосита иштирок этдилар. 

Конференцияда Ўзбекистон Республикаси Олий Мажлиси Қонунчилик палатасидаги “Адолат” СДП фракцияси аъзолари, вазирликлар ва олий таълим муассасалари вакиллари масофадан туриб мавзу юзасидан қизғин музокара олиб бордилар. Унинг якунида тадбир иштирокчилари томонидан соҳани ривожлантириш юзасидан амалий таклифлар билдирилди ва тавсиялар ишлаб чиқилди.

“Адолат” СДП Матбуот хизмати

Mulohazalar

М.Назарова, Бухоро вилояти Кенгаши Матбуот котиби   Электрон таълим ва масофали ўқитишнинг афзалликлари ва унинг ҳуқуқий асосларини такомиллаштириш масалаларига бағишланган электрон конференцияни республикамиздаги барча олий ўқув даргоҳлари қаторида Бухоро тиббиёт институти, Бухоро юқори технологиялар ва муҳандислик техника институти ва Бухоро давлат университети раҳбарияти вакиллари ҳамда ўқитувчилари томоша қилишди.
- Масофавий ўқитиш – энг яхши анъанавий ва инновацион методлар, ўқитиш воситалари ва формаларини ўз ичига олган сиртқи ва кундузги таълим сингари ахборот ва телекоммуникация технологияларига асосланган таълим формаси сифатида бўлиши билан бирга
янги ахборот технологиялари, телекоммуникация технологиялари ва техник воситаларига асосланган таълим тизимидир. Бугун Ўзбекистон Олий Мажлиси Қонунчилик палатасидаги “Адолат” СДП фракцияси ташаббуси билан бундай электрон конференциянинг уюштирилиши талабаларга таълим бериш жараёнида албатта ижобий натижаларга олиб келади - дейди Бухоро тиббиёт институти илмий ишлар проректори, тиббиёт фанлари доктори, «Адолат” СДП аъзоси Б.Б.Сафоев. - Бугунги электрон конференция орқали биз юртимиздаги барча олий ўқув даргоҳларида бу борада қилинаётган ишларни, амалга оширилган тадбирларни ва муаммоларни кўрдик, улардан кўп нарса ўргандик. Бу борада ўз таклифларимизни бердик. Партиямиз фракцияси томонидан бундай хайрли тадбирлар кўпроқ уюштирилиши тарафдориман.
Бир сўз билан айтганда,масофавий таълим – масофадан туриб ўқув ахборотларини алмашувчи воситаларга асосланган, ўқитувчи махсус ахборот муҳит ёрдамида, аҳолининг барча қатламлари ва чет эллик таълим олувчиларга таълим хизматларини кўрсатувчи таълим комплексидир. Таълимнинг бу каби янги соҳасида республикамизда 5 йилдан бери амалга оширилаётган ислоҳотлар ҳуқуқий асосларини такомиллаштириш масалаларига бағишланган мазкур конференция Бухородаги олий ўқув юртлари вакилларига маъқул бўлди.

---

И.Жўраев, Самарқанд вилояти Кенгаши Матбуот котиби   «Электрон таълим ва масофали ўқитишнинг ҳуқуқий асосларини такомиллаштириш масалалари»га бағишланган электрон конференция Самарқанддаги мавжуд еттита олий ўқув юртларида ҳам уюшқоқлик билан ўтказилди.
Мазкур электрон мулоқотда Самарқанд давлат университетининг бир гуруҳ мутахассислари, турли фалкультет профессор-ўқитувчилари, ахборот технологиялари маркази ходимлари, тадқиқотчи-магистирантлар, партия аъзолари ва фаоллари бевосита иштирок этишди.
Электрон конференцияда университет ахборот технологиялари кафедраси доценти А.Аҳадов «Самарқанд давлат университети мисолида электрон таълим ва масофавий ўқитишни ташкил қилишда эришилган ютуқлар ва муаммолар» хусусида маълумот берди.
Таъкидлаш жоиз, университетнинг расмий веб-сайти дастлаб 2000 йилда яратилган. 2003 йилга келиб эса у www.samdu.uz деган ном билан фаолият кўрсатиб келмоқда. Республика олий ўқув юртлари ичида биринчилар қаторида СамДУдаги факультет ва бўлимларнинг барча компьютерларини ўз ичига олган оптик толали локал тармоқ ишга туширилган. Видеоконференция қурилмалари эса университетда 2003 йилда ўрнатилган бўлиб, 2004 йилдан бошлаб ҳар йили юртимиздаги бир нечта нуфузли олий таълим муассасалари (ГулДУ, ҚарДУ, ЎзМУ, ТДПУ, ТДТУ, ТерДУ ва бошқалар) билан электрон конференциялар мунтазам ўтказиб келинмоқда. Ҳозирда университетда 850 та замонавий компьютерлар мавжуд бўлиб, уларнинг барчаси бўлимлар, факультет деканатлари, кафедраларни қамраб олган ягона локал тармоққа уланган. Бугунги кунда ушбу тармоқни янада кенгайтириш бўйича ишлар олиб борилмоқда.
Мазкур электрон мулоқотдан сўнг олий ўқув юртида масофали ўқитиш тизимини янада такомиллаштиришга бағишланган давра суҳбати ўтказилди. Унда университет ректори У.Тошкенбоев сўзга чиқиб, ушбу йўналишда эришилган ютуқлар билан бирга электрон таълим ва масофали ўқитишни ташкил қилишда юзага келаётган муаммоларга ҳам алоҳида тўхталиб ўтди.
– Аввало, ахборот таълим ресурсларининг глобал тармоқдаги ҳимоясини таъминлаш зарур, – деди ректор У.Тошкенбоев. – Шунинг билан бирга ахборот таълим ресурслари яратувчиларнинг муаллифлик ҳуқуқларини ҳимоялаш, масофавий ўқитиш технологияларини барча ўқув ва ўқитиш жараёнларида қўллаш ҳуқуқини таъминлаш ҳамда ахборот таълим ресурслари дастурий маҳсулотларини сертификатлаш ишларини ташкил этиш лозим. Бунинг учун эса амалдаги қонун ҳужжатларининг талабларини тўлиқ рўёбга чиқариш, унинг ҳуқуқий механизмини аниқлаштириш учун янги меъёрий ҳужжатлар ишлаб чиқиш керак. Шунингдек, мазкур йўналишни ривожлантириш ва амалиётга жорий этиш учун ҳамикорликда иш олиб бориш талаб этилади.
Тадбир сўнгида масофали ўқитиш тизимини дастлаб университет қошидаги академик лицей ва йўналишга доир касб-ҳунар коллежларида синаб кўриш бўйича дастурлар ишлаб чиқишга келишиб олинди. Партия вакиллари эса мазкур тажрибани қўллиб-қувватлаш юзасидан ўз таклифларини билдиришди.

Mulohaza qoldirish

Ism *:

Kod *: