Ўзбекистон  “Адолат” СДП Бухоро вилоят Кенгаши  томонидан Юртбошимизнинг “Ўзбекистон мустақилликка эришиш остонасида”  китобининг мазмун-моҳиятини ўрганишга бағишлаб ўтказилган сиёсий ўқишда вилоят Кенгаши аъзолари,  партия депутатлари, туман, шаҳар Кенгаши раислари, партия фаоллари, Аёллар ва Ёшлар қанотларининг вакиллари иштирок этдилар. 

Партиянинг вилоят Кенгаши раиси А.И.Турсунов ўз сўзида эл-юртимизнинг ана шу тарихан қисқа даврда босиб ўтган ғоят мураккаб, айни вақтда шарафли тараққиёт йўли, бу йўлда қўлга киритилган, бугунги кунда дунё ҳамжамияти томонидан ҳақли равишда тан олинаётган ютуқ ва марраларимизга қандай асосда, қандай оғир синов ва машаққатлар эвазига эришилганини англаш, уларнинг барчасини яхлит ҳолда, ички диалектик қонуниятлари, бор зиддият ва қарама-қаршиликлари билан тушуниб етишда бу китоб ишончли манба ва амалий қўлланма бўлиши ҳақида  тўхталиб ўтди. Маълумки, китобдаги мақола, суҳбат ва чиқишлар тарихан қисқа муддат – ўттиз ойга яқин вақтни қамраб олади. Аммо ундаги мазмун, моҳият, ўгитлар жилд-жилд китобларга ҳам сиғмаслиги аниқ. Сиёсий ўқишда юртбошимиз асарининг  шу томонларига эътибор қаратилди. 

- Бугунги сиёсий ўқишда  китобнинг алоҳида эътиборга моликлиги  айтиб ўтилди, - дейди партиянинг  Бухоро туман Кенгаши раиси Файзулло Раҳматов.- Биринчидан, бу китоб истиқлол тарихимизнинг шу вақтга қадар атрофлича ёритилмаган саҳифаларини ҳар томонлама чуқур исботланган, рад этиб бўлмайдиган аниқ тарихий ҳужжатлар асосида очиб беради ва шу тариқа ҳозирги вақтда турли уйдирмаларни усталик билан ишлатиб, бу бўшлиқни ғаразли мақсадларда тўлдиришга, шу масалада кимларнингдир режа ва буюртмаларини бажаришга, биз бошимиздан кечирган тарихий воқеаларни бузиб талқин этишга қаратилган уринишларга ҳеч қандай имкон қолдирмайди. 

Сиёсий ўқишда   ўша йиллардаги воқеа-ҳодисаларни ўз кўзи билан кўрган, уларга гувоҳ бўлган одамларнинг сафи бугунги кунда тобора камайиб бораётгани, униб-ўсиб келаётган ёш авлод эса бу тарихдан етарли даражада хабардор эмаслиги таъкидланди. Шу сабабли бу китобни ёшлар орасида кўпроқ тарғиб қилиш Ватанимиз тарихини ўрганиш йўлида муҳим бир қадамдир. 

- Сиёсий ўқишда бу китобни  яқиндан ўрганиш  давомида  биз Мустақилликнинг дастлабки йилларида юртимиздаги ҳаққоний аҳвол қандай бўлганлигини аниқ тасаввур қилдик, -дейди “Ёш адолатчилар”  қаноти раиси Умид Ҳамдамов.- Дарҳақиқат, бу китоб   ўша суронли йилларнинг энг ишончли ҳужжати сифатида вақт ўтиши билан унутилиб, йўқолиб кетиши мумкин бўлган ноёб маълумот ва манбаларни тиклаб, истиқлол тарихимизни сохталаштиришга йўл қўймасдан, уни ҳаққоний асосда яратиш, бугунги ва келгуси авлодларнинг уни чуқур ўрганиб, англаб етишлари учун мустаҳкам замин яратади. 

Ўзбекистон “Адолат” СДП Бухоро вилоят Кенгаши Матбуот хизмати

Mulohazalar

Mulohaza qoldirish

Ism *:

Kod *: