Давлатимиз раҳбари томонидан амалдаги йилни "Мустаҳкам оила йили" дея номланиши албатта оилага бўлган эътиборни янада оширди.  Мустаҳкам оила деганда  аввало соғлом оилани, она ва бола саломатлигини тушунамиз. Шу сабаб бугун тиббиёт ходимлари зиммасидаги масъулият янада ортганлиги ҳам бежиз эмас.

Бахтиёржон Усмонов партиямиз фаолларидан. У Андижон тумани  Харабек қишлоғидаги Дўнгқишлоқ маҳалласида яшайди. Кўп йиллардан буён "Истиқлол" қишлоқ врачлик пунктига раҳбарлик қилиб келаётган  шифокор доим қишлоқ аҳли саломатлигини мустаҳкамлаш, тиббий маданиятни юксалтириш, она ва бола саломатлигини муҳофаза қилишни бош вазифаси деб билади. Жамоа аъзоларига ҳам бу борада  бажарилиши лозим бўлган вазифаларни такрор-такрор уқтиради.

Яқинда Б.Усмонов хонадонида бўлдик. Шифокорлар оиласида сўз ва иш бирлигига амал қилинади. Турмуш ўртоғи Ҳидоятхон опа ва келини  Сурайёхонлар ҳам тиббиёт ходими бўлгани учун оила даврасида ҳар бир суҳбат аҳоли саломатлигига бориб тақалади. Оила кутубхонасидан ўрин олган китобларни варақлаймиз. Уларнинг аксарияти тиббиётга бағишланган.

- Албатта оила мустаҳкамлиги кўп жиҳатдан оила аъзоларининг саломатлигига боғлиқ. Оилада биринчи навбатда она соғ­лом бўлмоғи зарур,- дейди шифокор Б.Усмонов, - Шу сабаб ишда ҳам, оилада ҳам бу масалага алоҳида эътибор қаратаман. Яна бир нарсани таъкидлаш лозим. Спорт билан яқинлик ҳам саломатлик гаровидир.

Бахтиёр ака бежиз таъкидламади. Унинг ўғли Фарруҳбек жисмоний тарбия ўқитувчиси. Ота-она таъсирида у спортни аввало саломатлик манбаи сифатида  танлади. Оиланинг кенжатойи Умидахон ҳам ҳозирдан спорт билан машғул.

Дўнгқишлоқ маҳалласида яшовчи Усмоновлар оиласини бутун қишлоқ аҳли ҳурмат билан тилга олади. Бу оила аъзоларининг доим эл хизматида эканлиги ва барчага ўз оиласи билан ибратлиги натижасидир. Мана шундай оилалар жамиятимизда  кўпаяверсин.

“Адолат” СДП Андижон вилояти Кенгаши Матбуот хизмати

Mulohazalar

Mulohaza qoldirish

Ism *:

Kod *: